FAI O TEU PROPIO XOGO DE MEMORIA

Hoxe queremos compartir con vós un xogo moi sinxelo e divertido que podedes facer na casa.

 Se tedes a sorte de vivir coas vosas avoas ou avós animádevos a xogar xuntos. É unha oportunidade excelente para falar en galego con eles e preguntarlles, por exemplo, a que xogaban de pequenos.
 Ademais exercitar a memoria sempre é unha boa idea para calquera idade! 

Precisades:

• tapóns de plástico
• un folio
• tesoira
• pegamento
• lapis de cores

Como se fai?

1. Repasamos o contorno dos tapóns sobre o folio e coloreamos os círculos de diferentes cores. 

2. Recortamos e pegamos os círculos sobre os tapóns. Co resto de folio recortamos rectángulos e pintamos series de cores alternándoas. 

Como se xoga?

Pode xogar só unha persoa, unha parella ou varias persoas por quendas. 

Ensinámoslle unha das tarxetas á xogadora ou xogador durante cinco segundos e logo agochámola. Ten que recordar a serie de cores e ordenala correctamente cos tapóns. 

É moi doado para ti?

Podes complicar o xogo tanto como queiras!  Só tes que engadir tantos tapóns de cores como desexes. Atréveste con sete?

Agardamos que vos gustase esta idea.